(الحوار التالي حدث أصلا باللغة الهيروغيريفية وقمت بترجمته إلي اللهجة المصرية حتى تعم الفائدة)
هرم خوفو: مالك يا أبو الهول، ما أسكت الله لك حسا!
أبو الهول: ما أنا ساكت بقالي 4500 سنة!
هرم خوفو: طيب إيه إللي خلاك قربت تنطق أخيرا؟
أبو الهول: إنت مش دريان باللي بيحصل حوالينا؟
هرم خوفو: خير إيه إللي حصل؟ أنا كنت نايم؟
أبو الهول: ما أنت طول عمرك نايم؟
هرم خوفو: لأ.. بس أنا آخر مرة صحيت لما جه هنا الخواجة نابليون من ييجي 300 سنة!
أبو الهول: لأ يا حبيبي نابليون كان هنا من 215 سنة بالضبط .
هرم خوفو: يا أبو الهول إنته حتمسك لي على الواحدة، إحنا حتفرق معانا مية ولا ميتين سنة؟
أبو الهول: ألا صحيح قول لي، إنت إيه إللي خلاك تصحي فجأة أيام نابليون؟
هرم خوفو: نابليون عمل عمايل مدهشة، كفاية إنه جاب العلماء بتوعه وخللا العالم كله يعرف العظمة إللي كانت فيها أرض أيجبتوس (مصر) وفتح بلدنا للعالم كله.
أبو الهول: آه ياشيخ إسكت.. ما تفكرنيش بالأيام الجميلة دي، تصور إني قعدت مدفون في الرمل أكثر من ثلاثة آلاف سنة وماحدش فكر يزيح الرمل عن صدري لغاية ما جه العلماء الخواجات وكشفوا الرمل عن جسمي.
هرم خوفو: أنا كنت بأستغرب إزاي كنت مستحمل الرمال دي كلها على صدرك كل السنين دي كلها؟؟
ابو الهول وهرم خوفو في حوار حميم
أبو الهول: آه أسكت ياشيخ ،ده أنا كان نفسي مكتوم كتمة ولا كتمة كحك عيد جلوس رمسيس على العرش!! هو أنا بطلت أتكلم من شوية، حتى طلعوا على quot;صمت أبو الهولquot; و quot;أبو الهول أخيرا نطقquot; وكل التشنيعات دي، يعني هو أنا كنت ساكت بمزاجي؟ لكن إللي مجنني أنا أزاي الناس دي شايفة راسي طالعة من أكوام الرمل، وما كانش عندهم أي نوع من حب الإستطلاع يكشفوا الرمل ده عن رقبتي ويشوفوا بقية جسمي؟
هرم خوفو: الناس مشغولة بأكل عيشها.
أبو الهول: لأ ده كسل بعيد عنك، أنا مش عارف أحفاد الفراعنة العظماء راحوا فين؟؟
علماء وجنود خواجات وقد بدأوا يكشفون الرمال عن جسد أبو الهول
هرم خوفو: موجودين في المزارع والمصانع وكثير منهم ساب البلد وهاجروا ومعظمهم قاعدين يتكلموا بس ويتفرجوا على القلة إللي بتشغل.
أبو الهول: أنت عارف كثير هاجروا وسابوا بلدنا ليه؟
هرم خوفو: ليه ياترى؟
أبو الهول: لأنهم شعروا إن بلاد الفراعنة العظيمة ما أصبحتش عظيمة، وإستولي عليها مجموعة من الأفاقين الذين لا يمتون للفراعنة بصلة وما إتعلموش أي شئ من أجدادهم العظام، مش عارفين إن العمل والإجتهاد كانوا أساس الحضارة الفرعونية، ما أتعملوش أن العدل بدأ هنا على ضفاف النيل، لما كان الفرعون يوزع مياه النهر العظيم بالعدل ببركات الإله العظيم حابي جالب السعادة للوادي، وإن الهندسة والطب بدأت هنا ويكفينا أمحوتب أول مهندس وأول طبيب في التاريخ باني هرم زوسر (سقارة) العظيم أول بناء ضخم في تاريخ البشر، حأقول لك إيه ولا إيه، وبعد كل ده ييجي الخواجات عشان يزيحوا الرمال إللي كانت طابقة على أنفاسي.
هرم خوفو: الصبر يا أبو الهول الصبر.
أبو الهول: أكثر من كده صبر، ما أنت طبعا مش همك حاجة قاعد على قلبي بقالك خمسة آلاف سنة، ولا أي حاجة تأثر فيك! مش زيي أنا كل شوية تقع مني حتة ويعطوني حقن كالسيوم للترميم!!
هرم خوفو: بأقول إيه يا أبو الهول بطل قر على، كفاية عليك الوش الحلو والإبتسامة الغامضة ولا إبتسامة موناليزا!!
أبو الهول: أهو أنا حأسيب لك منطقة الأهرامات كلها وحأسيب لك البلد بما فيها
هرم خوفو: ليه خير رايح فين
أبو الهول: أصلي سمعت إن فيه مجانين بيقولوا إن الحضارة الفرعونية حضارة عفنة، وعاوزين يهدموا الآثار المصرية، والظاهر إنهم ناويين يبدأوا بي
هرم خوفو (ضاحكا): بطل جبن وخوف يا أبوالهول، ده كله كلام تهويش
أبو الهول: تهويش إيه يا عم إنت مش شايف الحراسة في منطقة الهرم زادت إزاي؟؟
هرم خوفو: آه والله عندك حق، وناوي تعمل إيه
أبو الهول: أنا جاي لي عقد عمل في قطر، ومقدم على طلب هجرة لكندا
هرم خوفو: وأنته حتستحمل برد كندا، ده أنت كان يجي لك روماتيزم في رقبتك
أبو الهول: طيب وإيه العمل
هرم خوفو: أنا رأيي إنك تقدم على هجرة إستراليا، أنا سمعت أنهم فاتحين باب الهجرة للتماثيل الكبيرة
أبو الهول: والله فكرة، وخللي بالك يا حبيبي الدور جاي عليك، مش بعيد يفكوك وياخدوا أحجارك يعملوا بيها مساكن شعبية!!
هرم خوفو: تف من بقك، فال الله ولا فالك، ما أنت طبعا خفيف تقدر تتحرك وتهرب بسهولة
أبو الهول (ضاحكا): والله حتوحشني يا خوفو، وحتوحشني طلتك على كل يوم مع شروق الإله رع
هرم خوفو(يداري دمعة كبير نزلت تتدحرج على أحجاره): أنا دايما بأتفاءل بيك وبابتسامتك الجميلة، إنما إنت إزاي حتقدر تهرب من البلد والحراسة؟؟
أبو الهول: أنا عندي واحد قريبي من الأقصر بيشتغل في الجمرك!!
وتابعونا على تويتر
@samybehiri